Азаматтық авиация персоналын кәсіби даярлау
Азаматтық авиация персоналын кәсіби даярлау бастапқы даярлауды, қайта даярлауды және кәсіби деңгейін қолдауды қамтиды. Авиациялық персоналды бастапқы даярлау және қайта даярлау авиациялық оқу орталықтарында жүзеге асырылады. Кәсіби деңгейін қолдау авиациялық оқу орталықтарында және (немесе) азаматтық авиация ұйымдарында жүргізіледі.
Авиациялық персонал мен азаматтық авиация ұйымдарының басшыларын кәсіби даярлау кезінде қолданылатын қағидалар, іске асыру тәртібі, кезеңдерді ұйымдастыру, бағдарламалардың ең төменгі көлемі және басқа да критерийлер ұшу қауіпсіздігін қамтамасыз етуге қатысатын авиациялық персоналды кәсіби даярлаудың типтік бағдарламаларымен белгіленеді.
МАҢЫЗДЫ АҚПАРАТ
Қазақстан Республикасының авиациялық персоналын даярлау үшін шетелдік авиациялық оқу орталықтарын қолдану шарттары
Қазақстанның Авиациялық әкімшілігі шетелдік авиациялық оқу орталықтарының сертификаттарын тану тәртібімен, Қазақстан Республикасының Инвестициялар және даму министрінің міндетін атқарушының 2015 жылғы 6 ақпандағы №115 бұйрығымен бекітілген азаматтық авиацияның авиациялық оқу орталығын сертификаттау және сертификат беру қағидаларына сәйкес, оларды авиациялық персоналды бастапқы даярлау, қайта даярлау және кәсіби деңгейін қолдау үшін қолдануға рұқсат береді.
Қазақстанның Авиациялық әкімшілігінің сайтында Қазақстан Республикасының азаматтық авиация персоналын кәсіби даярлауды жүзеге асыратын танылған шетелдік авиациялық оқу орталықтарының тізілімі жарияланған.
Даярлау үшін шетелдік авиациялық оқу орталығын таңдағанда, оның атауы мен сертификат нөмірінің Тізілімде көрсетілген мәліметтермен сәйкес екеніне көз жеткізу қажет.
Авиациялық персоналды кәсіби даярлау тек тізілімде көрсетілген бағдарламалар мен даярлау түрлері шеңберінде, танылған шетелдік авиациялық оқу орталығының сертификатының қолдану саласына сәйкес жүзеге асырылады.
Қазақстанның Авиациялық әкімшілігінің лицензиялау департаменті өтініш берушілерге өтінішті бермес бұрын шетелдік авиациялық оқу орталығының кәсіби даярлау бағдарламасын Қазақстан Республикасының азаматтық авиация саласындағы нормативтік-құқықтық актілер талаптарына сәйкестігін талдауды ұсынады.
LTAS Ltd. ұйымы EALTS тестілеу жүйесінің әкімшісі ретінде қызметін тоқтатты. Осыған байланысты 2024 жылғы 22 қарашадан бастап EALTS тестілеу жүйесі Қазақстан Республикасының аумағында радиотелефондық байланыста қолданылатын ағылшын тілін меңгеру деңгейін анықтау үшін енді қолданылмайды.
Сұрақтар туындаған жағдайда келесі электрондық пошта мекенжайына хабарласуыңызды сұраймыз: ATO@caa.gov.kz
