Қазақстан Республикасының Үкіметі отандық әуежайлардың бәсекеге қабілеттілігін арттыруға және елдің транзиттік әлеуетін нығайтуға бағытталған жүйелі шешім қабылдады.

Әуежай инфрақұрылымына қолжетімділікті қамтамасыз ету және салық ауыртпалығын азайту бойынша бірқатар үкіметтік шараларды іске асыру мамандандырылған авиациялық отын операторы «ҚазМұнайГаз-Аэро» ЖШС-не («ҚазМұнайГаз» ҰК АҚ еншілес компаниясы») халықаралық әуе компанияларына түбегейлі жаңа шарттар ұсынуға мүмкіндік берді.

2026 жылдың қаңтарынан бастап халықаралық жүк және жолаушылар тасымалдаушылары үшін ұшаққа жанармай құю құны ағымдағы нарықтық жағдайларды ескере отырып, реактивті отынның бір тоннасына 930-1000 АҚШ долларына дейін төмендетілді, бұл бұрын республикалық маңызы бар қалалардағы әуежайларда 1200 АҚШ доллары болған.

Бұл шара үкіметтің ашық және болжамды авиациялық отын нарығын құру бойынша жүйелі саясатының бөлігі ретінде жүзеге асырылуда. Реактивті отынның құнын төмендету, халықаралық авиациялық отын операторларының тәжірибесін енгізу және бірыңғай бәсекеге қабілетті нарықтық ортаны құру Қазақстанды аймақтағы негізгі авиациялық транзиттік хабқа айналдырудың берік негізін қалайды.

Бүгінгі таңда «ҚазМұнайГаз-Аэро» компаниясының Turkish Airlines, Turkish Cargo, FlyDubai, Red Sea, Air Cairo, Somon Air, FlyMeta және Silk Way West Airlines сияқты бірқатар жетекші халықаралық әуе компанияларымен ұшақ ішінде жанармай құю бойынша тікелей келісімшарттары бар.