2040 жылға қарай әлемдегі жүк тасымалының 20 пайызы Еуропа-Азия бағытына тиесілі болады. 

Ал дәл осы екі құрлықты байланыстырып тұрған Қазақстан халықаралық ірі авиахабқа айналуға тиіс. Мемлекет басшысының тапсырмасына сәйкес елдегі әр әуежайдың бәсекеге қабілетті тұстарын айқындап, инфрақұрылымын дамыту міндеті тұр. Қазір алты өңірде авиахаб бар. Олар Астана, Алматы, Шымкент, Қарағанды, Ақтау және Ақтөбе қалаларында орналасқан. Бірқатар өңірде әуежай терминалын және ұшу-қону алаңдары жөнделіп жатыр. Былтыр Қазақстан аспаны арқылы 173 мың тонна тауар тасымалданған. Ал биыл 4 ай ішінде 50 мың тонна жүк жөнелтілді. Мультимодальді логистиканы дамытуға тиіс ұлттық авиакомпания биылдан бастап әуе кемелерін сатып алуға кіріседі.

Әділет Көбенов, «Қазақстанның авиациялық әкімшілігі» АҚ Стратегиялық өзара іс-қимыл және бастамалар басқармасының басшысы:

- Әрине, басқаларымен салыстырғанда Алматы мен Астана қаласында рейстер саны көп. Соларды жандандыру бойынша жоспарланған жұмыстар бар. Әр әуежайға өзінің деңгейінде тиісті жоспарлар қарастырылған. Еуропа мен Азия арасы, Қытай, Жапония, Оңтүстік-Шығыс Азия бағыты бойынша әуе тасымалы жүзеге асырылып жатыр.