ҚР Көлік вице-министрі Талғат Ластаевтың тапсырмасына сәйкес және Азаматтық авиация комитетінің қолдауымен Қазақстанның авиациялық әкімшілігі Ақтау халықаралық әуежайында «Best Airport Service» пилоттық жобаны іске асыруда.

Жолаушыларға әуежай қызметтерінің сапасы туралы сауалнаманың бірінші кезеңі мамыр айында өткізілген болатын. Алынған мәліметтер негізінде тамыз айында Қазақстанның авиациялық әкімшілігі жерүсті қызметтерінің, кеден, шекара және құқық қорғау органдарының өкілдері үшін семинар ұйымдастырды. Шараның мақсаты – сервисті жақсарту және әуежайда туындайтын жанжалды жағдайларды реттеу.

Сондай-ақ, Қазақстанның авиациялық әкімшілігі және Air Astana сарапшылары жүйелі негізде авиациялық қауіпсіздік мәдениеті бойынша оқыту тренингтерін өткізеді.

Алдағы айларда қосымша семинарлар мен жолаушыларға сауалнама жүргізудің келесі кезеңдерін өткізу жоспарлануда.

Жобаның аралық қорытындылары ҚР КМ Азаматтық авиация комитеті төрағасының орынбасары Дархан Қатышев, Ақтау халықаралық әуежайының бас директоры Меруерт Жолдыбаева, Қазақстанның авиациялық әкімшілігі бас директордың авиациялық қауіпсіздік жөніндегі орынбасары Дархан Еспотанов, Қазақстанның авиациялық әкімшілігі авиациялық қауіпсіздік департаментінің аға директоры Данияр Қаңлыбаевтың  қатысуымен өткен кеңесте қаралып, Қазақстанның авиациялық әкімшілігі және басқа да мемлекеттік мекемелер өкілдерінің баяндамалары тыңдалды. Қызмет көрсету сапасын, әуежайдың танымалдығын арттыру, қауіпсіздікті күшейту және ішкі процестерді оңтайландыру мәселелері талқыланды.

Тәжірибе алмасу және әзірленген тәсілдерді одан әрі енгізу үшін кеңеске бақылаушылар ретінде Астана және Алматы қалалары әуежайларының авиациялық қауіпсіздік қызметтерінің басшылары шақырылды.

Мәжіліс қорытындысы бойынша жолаушылардың жайлылығын арттыруға бағытталған нақты ұйымдастырушылық және практикалық шаралар әзірленді. Жобаны іске асыру нәтижелері Қазақстанның авиациялық әкімшілігінің ақпараттық ресурстарында жарияланатын болады.

Қазақстанның авиациялық билігі жолаушыларды әуежайда қызмет көрсету сапасын жақсарту үшін сауалнамаларға белсенді қатысуға шақырады. Сауалнамаға қазақ, орыс және ағылшын тілдерінде әуежай ғимаратында орналасқан QR-кодтар арқылы қол жеткізуге болады.