ICAO Еуропалық және Солтүстік Атлантикалық Бюросына ICAO EUR/NAT-DGCA/2025 мүше елдердің дауыс беру қорытындысы бойынша Қазақстан Республикасы Көлік министрлігі Азаматтық авиация комитетінің төрайымы Салтанат Томпиева ICAO EUR/NAT-DGCA/2025 авиациялық билік басшыларының жыл сайынғы жиналысы төрағасының орынбасары болып сайланды. Сондай-ақ, отырыстың төрайымы болып Австрияның Ұлттық авиация басқармасының басшысы Карин Пулео- Леоделтер, басқа орынбасары болып Болгария Азаматтық авиациясы бас дирекциясының директоры Анелия Маринова сайланды.
Естеріңізге сала кетейік, бүгін Парижде ИКАО Еуропалық және Солтүстік Атлантикалық бюросының ( ICAO EUR/NAT-DGCA/2025 ) Азаматтық авиацияның бас директорларының кеңесі басталды, ол азаматтық авиацияның қауіпсіз, сенімді, тұрақты және инклюзивті дамуын қолдау үшін өңіраралық ынтымақтастықты нығайтудың негізгі стратегиялық аспектілеріне арналған.
Отырыстың күн тәртібінде ұшу қауіпсіздігін арттыруға, аэронавигациялық әлеует пен тиімділікті дамытуға бағытталған өңірлік қызметтегі инновациялар, авиациялық қауіпсіздік мәселелері және әуе құқығы саласындағы халықаралық шарттарды ратификациялау қарастырылған.
Салтанат Томпиева өз сөзінде ICAO EUR/NAT-DGCA/2025 командасына маңызды іс-шараны ұйымдастырғаны үшін алғысын және авиация саласының тиімділігін арттыру үшін мемлекеттер арасындағы ынтымақтастық пен үйлестіруді нығайтудың маңыздылығын білдірді.
«Қазақстан ИКАО-ның барлық бастамаларын, стратегияларын және күш-жігерін толығымен қолдайды және ұшу қауіпсіздігі мен тұрақты дамуды қамтамасыз ету мақсатында ынтымақтастық пен халықаралық интеграцияға жәрдемдесу арқылы авиациядағы ең жоғары стандарттарға қол жеткізуге ерекше көңіл бөлуді жалғастыруда», - деп атап өтті Комитет Төрағасы.
ICAO EUR/NAT-DGCA/2025 Төрағасы мен оның орынбасарларының негізгі міндеттері жыл сайынғы отырыстың жұмысын ұйымдастыру, аймақ елдерінің авиация қызметі бойынша өзара іс-қимылын үйлестіру, есептерді дайындау және жаһандық авиацияның дамуына ықпал ететін жаңа бастамаларды әзірлеу болып табылады.
Қазақстан өкілінің осындай жоғары лауазымға сайлануы елдің халықаралық беделін нығайтуға көмектеседі және оның Орталық Азиядағы азаматтық авиация секторындағы жетекші ойыншылардың бірі ретіндегі рөлін растайды.