Албена қаласында (Болгария) European Controllers Cup (ECC 2026) халықаралық футбол турнирі аяқталды. Оның қорытындысы бойынша ҚР КМ Азаматтық авиация комитеті «Қазаэронавигация» РМК әуе диспетчерлерінің командасы 36 қатысушы команда арасында чемпиондық титулды жеңіп алды. Бұл жеңіс Қазақстан құрамасы үшін Еуропа әуе диспетчерлері арасындағы беделді турнирде қатарынан екінші болды. Турнир барысында команда жоғары деңгейдегі кәсіби дайындықты, ұйымшылдықты және командалық рухты көрсетті. Матчтар шиеленісті және бәсекелі күресте өтті, ал қарсыластар шеберліктің жоғары деңгейін көрсетті. Қазаэронавигация командасы өзінің қажырлылығы мен жеңіске деген ұмтылысының арқасында чемпиондық атағын сақтап қала алды. Еске сала кетейік, 2025 жылы Қазаэронавигация құрамасы Маастрихт қаласында (Нидерланды) өткен ECC 2025 турнирінде де жеңіске жеткен болатын. Осылайша, команда екінші жыл қатарынан Еуропаның әуе диспетчерлік қызметтері арасындағы ең үздік футбол құрамаларының бірі деген мәртебесін дәлелдеп отыр. Турнир дәстүрлі түрде маңызды спорттық іс-шара ғана емес, сонымен қатар халықаралық кәсіби өзара іс-қимылды нығайту үшін тиімді алаң болып табылады. Еуропаның түрлі елдерінен келген диспетчерлік қызметтер мен авиация саласының өкілдері тәжірибе алмасуға, кәсіби мәселелерді талқылауға және бейресми жағдайда іскерлік байланыстарды кеңейтуге мүмкіндік алды.