Қазақстанның авиациялық әкімшілігінде өткен жылдың қорытындысы бойынша ұшу тұрақтылығы және көрсетілетін қызметтердің сапасы және 2025–2026 жылдарға арналған жоспарларды талқылау бойынша жұмыс тобының отырысы өтті.

Оған ҚР Көлік министрлігі Азаматтық авиация комитетінің, Қазақстанның авиациялық әкімшілігінің, әуежайлар мен авиакомпаниялардың өкілдері қатысты.

Азаматтық авиация комитетінің мәліметі бойынша, рейстердің жиілігі 2025 жылдың басынан бастап 2024 жылмен салыстырғанда 3%-ға өсті және аптасына 716 рейсті құрады. Рейстерді орындаудың ұқыптылық пайызы 76% құрады. Бұл ретте алдыңғы көрсеткіштермен салыстырғанда кідірістердің ұзақтығы қысқарды.

Отырыста сондай-ақ ҰОС Жеңісінің 80 жылдығына және Отан қорғаушылар күніне арналған шеруге байланысты Астананың әуе кеңістігінің жабылуы туралы айтылды: ағымдағы жылғы 22 сәуірден 7 мамырға дейін сағат 10:00-ден 13:00-ге дейін. Көрсетілген кезеңде әуежай үздіксіз жұмысты қамтамасыз ету және рейстердің кешігуін азайту үшін бірқатар ұйымдастырушылық және техникалық шараларды іске асыратын болады.

Сонымен қатар, отырыста қауіпті жүктер жөніндегі басқармасының мамандары жердегі қауіпсіздікті қамтамасыз ету мақсатында қауіпті жүктерді дұрыс өңдеудің рөлін атап өтті. Сондай-ақ, сала өкілдерінің жолаушыларға қызмет көрсету процестерін жақсарту және жаңғырту жөніндегі ұсыныстары тыңдалды.

Сондай-ақ жерүсті өндірістік қызметтердің қауіпсіздігін қамтамасыз ету және ерекше қажеттіліктері бар жолаушылар үшін әуе көлігінің қолжетімділігін арттыру мәселелеріне де назар аударылды.

Отырыс соңында 20 жылдан астам авиация саласында еңбек еткен әуежайлар мен авиакомпаниялардың қызметкерлері өздерінің функционалдық міндеттерін адалдығы мен сапалы орындағаны үшін алғыс хаттармен марапатталды.