2021 жылғы 7 желтоқсанда берілген өтінішіне сәйкес 2022 жылғы 7 ақпаннан бастап Питер Гриффитстің "Қазақстанның авиациялық әкімшілігі" АҚ Бас директоры қызметіндегі өкілеттігі өз еркімен тоқтатылады.

Питер Гриффитс "Қазақстанның авиациялық әкімшілігі" АҚ құрылғаннан бері 2 жылдан астам жұмыс істеді және авиациялық реттеушінің дамуына үлкен үлес қосты.

Оның басшылығымен азаматтық авиацияны басқару бойынша алдыңғы қатарлы еуропалық модельге сәйкес авиациялық әкімшіліктің қалыптасуы өтті. Мұндай тәсіл Қазақстанда алғаш рет енгізілді және ТМД елдері арасында бірегей болып табылады.

2021 жылғы 2-11 тамыз аралығында ұшу қауіпсіздігі бойынша ИКАО-ның Үйлестірілген валидациялық миссиясы (ICVM) шеңберінде ИКАО аудиторларының саланы тәуелсіз тексеру қорытындылары бойынша Қазақстан ИКАО стандарттарына сәйкестіктің орташа әлемдік деңгейінен 15%-ға асып, 84%-ға жетті.

Питер Гриффитске табысты ынтымақтастық және бірлескен жұмыстағы жоғары кәсібилік үшін шынайы алғысымызды білдіреміз!

2022 жылғы 7 ақпаннан бастап Линда Орлэди "Қазақстанның авиациялық әкімшілігі" АҚ Бас директоры міндетін уақытша атқаратын болады, ол 2019 жылғы желтоқсаннан бастап Бас директордың бірінші орынбасары, ұшу қауіпсіздігінің бастығы қызметін атқарып келді.